Frá Samtökum um kvennaathvarf; helstu tölur frá árinu 2019

Árið 2019 dvöldu 144 konur og 100 börn í Kvennaathvarfinu. Konur dvöldu í athvarfinu frá einum degi uppí 236 daga, að meðaltali í 30 daga. Börn dvöldu í athvarfinu í frá einum degi upp í 155 daga, að meðaltali í 39 daga. Að meðaltali dvöldu 23 íbúar í athvarfinu á dag, 12 konur og 11 börn.

Að auki komu 294 konur í samtals 545 viðtöl án þess að til dvalar kæmi. Samtals komu því 438 konur í athvarfið í viðtöl eða dvöl á árinu. Til viðbótar hittu ráðgjafar athvarfsins 214 einstaklinga í viðtölum í Bjarkarhlíð, miðstöð fyrir þolendur ofbeldis.

Í heildina voru 67% kvenna sem komu í Kvennaathvarfið á árinu íslenskar (74% þeirra sem komu í viðtöl og 51% dvalarkvenna),  74% kvennanna eru af höfuðborgarsvæðinu. Konurnar voru á aldrinum 18-81 árs en börnin frá nokkurra daga gömlum upp í 16 ára.

Flestar konur nefna fleiri en eina ástæðu komu.

 Ástæða komuHlutfall
 Andlegt ofbeldi93%
 Líkamlegt ofbeldi60%
 Fjárhagslegt ofbeldi48%
 Kynferðislegt ofbeldi37%
 Ofbeldi gegn börnum35%
 Morðhótanir26%
 Kyrkingatak25%
 Stafrænt ofbeldi20%
 Eltihrellir16%

 

Aldrei hafa fleiri konur nefnt ofbeldi gegn börnum sem ástæðu komu í athvarfið. Fram kemur í svörum kvennanna að alls búa 349 börn undir 18 ára að aldri á ofbeldisheimilunum sem þær koma af. Einungis 27% barnanna höfðu fengið einhverja aðstoð vegna þess ofbeldis sem barnið bjó við á heimili sínu en 44% kvennanna sögðu að barnavernd hefði verið tilkynnt um ofbeldið.

Alls voru 12% kvennanna með líkamlega áverka við fyrstu komu í athvarfið (23% dvalarkvenna og 6% kvenna í viðtölum) en rúmlega helmingur (53%) sögðu frá því að hafa einhvern tíma hlotið líkamlega áverka í sambandinu. 54% sögðust hafa óttast um líf sitt í sambandinu, 42% sögðu lögreglu hafa komið á vettvang ofbeldisins í eitt eða fleiri skipti, 15% kært ofbeldið til lögreglu, meirihluti (60%) þeirra mála var enn í vinnslu en dómur hafði fallið í 5% málanna, 16% kærðra mála hafði verið verið felld niður,  5% höfðu fengið nálgunarbann og 5% neyðarhnapp.

Hér má sjá upplýsingar um það hvert konurnar fóru að lokinni dvöl í athvarfinu.

Afdrif dvalarkvenna Hlutfall
Ættingjar / vinir17%
Heim til ofbeldismannsins15%
Nýtt húsnæði13%
Heim, ofbeldismaðurinn ekki þar12%
Úr landi8%
Sjúkrastofnun3%
Annað8%
Ekki vitað / í athvarfi yfir áramót23%

 

Gerendurnir voru að 95% karlmenn, 72% eru af íslenskum uppruna og voru þeir á aldrinum 18-83ja ára.

Hér má sjá tengsl þeirra við konurnar.

Tengsl við gerandaHlutfall
Eiginmaður26%
Sambýlismaður13%
Kærasti6%
Fyrrverandi eiginmaður13%
Fyrrverandi sambýlismaður15%
Fyrrverandi kærasti11%
Annar15%

 

Nánari upplýsingar veitir Sigþrúður Guðmundsdóttir, framkvæmdastýra athvarfsins
sigthrudur@kvennaathvarf.is eða í síma 869 7225