Fréttir
Aðgerðir gegn heimilisofbeldi í Noregi
Fyrsti hluti aðgerðaráætlunarinnar gengur út á að styrkja samvinnu og auka þekkingu á heimilisofbeldi innan kerfisins. Það á ekki að skipta máli hvert konur og börn sem verða fyrir heimilisofbeldi snúa sér fyrst, kunnáttan til að leiðbeina þeim á rétta staði skal vera alls staðar í kerfinu. Þetta krefst þverfaglegrar samvinnu milli kvennaathvarfa, lögreglunnar, félagsþjónustunnar, barnaverndaryfirvalda og heilbrigðisþjónustunnar. Til að ná þessum markmiðum verður meðal annars sett fjármagn í að halda úti þverfalgegum teymum innan sveitarfélaga en slík tilraunaverkefni hafa gefið góða raun í Noregi.
Annar hluti áætlunarinnar tekur á sýnileika heimilisofbeldis og forvörnum gegn þeim. Auka á upplýsingar um ofbeldið, birtingamyndir og afleiðingar þess meðal annars í gegn um netið og fræðslumyndbönd þar sem reynsla fólks er gerð sýnileg. Ennfremur skal endurskoða verklagsreglur fagfólks með það að markmiði að bæta hlustunarskilyrði einfaldlega með því að spyrja út í heimilisofbeldi ef grunur um slíkt vaknar hvar sem er í kerfinu. Símaþjónusta með „grænu númeri“ skal vera tiltæk allan sólarhringinn fyrir konur og börn sem búa við ofbeldi.
Í þriðja hlutanum er komið inn á mikilvægi þess að fórnarlömb heimilisofbeldis fái aðstoð við hæfi, vernd og stuðning til að koma sér út úr óþolandi aðstæðum. Í þessu felst fræðsluátak til að kynna fólki réttindi sín og möguleika til sjálfshjálpar. Þá er lögð mikil áhersla á að styrkja kvennaathvörf og önnur úrræði. Börn sem verða vitni að ofbeldi í fjölskyldunni verður gefinn sérstakur gaumur og í raun er staðfest í áætluninni að í slíkum tilvikum er um andlegt ofbeldi á börnum að ræða og þar af leiðandi barnaverndarmál. Barnaverndaryfirvöld skulu fá fræðslu á þessum grunni til að vera betur í stakk búin til að vernda börn gegn því að verða vitni að ofbeldi. Í þessum hluta er einnig lögð áhersla á að endurskoða löggjöfina með tilliti til verndunar kvenna og barna gegn heimilisofbeldi.
Fjórði og síðasti hlutinn tekur á rót vandans, þ.e. ofbeldismönnunum og meðferð þeirra. Þeir skulu aðstoðaðir við að rjúfa vítahringinn og lifa án þess að beita ofbeldi. Einnig er mikilvægt að styrkja rannsóknir á því af hverju gripið er til ofbeldis og fræða fagfólk um slíkt.
Á heildina litið er aðgerðaráætlunin til fyrirmyndar og í gegn um hana skín raunverulegur vilji til að taka á ofbeldi innan fjölskyldna og á heimilum. Hugmyndafræðilegur grundvöllur aðgerðaráætlunarinnar er að heimilisofbeldi er samfélagslegt vandamál og fórnarlömb þess eiga skýlausan rétt til verndar af samfélaginu. Ekki einungis er tekið á afleiðingum ofbeldis heldur lögð áhersla á fyrirbyggjandi aðgerðir og að taka á rót vandans.
