Fréttir
Ísland eftirbátur annarra Evrópuþjóða
Gleðifréttirnar eru þær að stjórnvöld hafa tekið við sér undanfarin tvö ár varðandi skráningu kynbundins ofbeldis hjá lögreglu og úrræði fyrir ofbeldismenn. Þá tryggir hið opinbera einnig fjárframlög til frjálsra félagasamtaka eins og Samtaka um kvennaathvarf og Stígamóta til að reka þjónustu við konur sem verða fyrir ofbeldi. Fræðslu til fagstétta og skólabarna er hins vegar verulega ábótavant hér á landi og eins siðareglur fjölmiðla í umfjöllun um mál er varða ofbeldi karla gegn konum. Þá sárvantar nýlegar rannsóknir á þessu sviði hér á landi, en síðasta rannsókn á ofbeldi gegn konum var framkvæmd 1996 og tók aðeins til líkamlegs ofbeldis maka.
Skýrsla Evrópuráðsins rennir stoðum undir þær tillögur sem Samtök um kvennaathvarf, ásamt öðrum félagasamtökum, hafa lagt fyrir stjórnvöld. Hún sýnir einnig glöggt að þau ríki sem myndarlegast taka á málum gera það með heildstæðum hætti í góðu samráði við frjáls félagasamtök. Skýrsluna í heild má nálgast hér.
