Fréttir
Skipta myndir máli?
Í dag, miðvikudaginn 5. október, efnir UNIFEM á Íslandi í samvinnu við Alþjóðlega kvikmyndahátíð í Reykjavík til pallborðsumræðna um mikilvægi kvikmynda til eflingar mannréttindum.
Kvikmyndir eru einstakur miðill sem ná á undraverðan hátt að tjá sammannlega reynslu. Í mannréttindaflokki hátíðarinnar eru verðlaunamyndir sem sýna sjónarhorn fólks sem á að öllu jöfnu ekki opinbera rödd. Markmið pallborðsumræðanna er að ræða hvort og þá hvernig kvikmyndir og kvikmyndagerð geta haft áhrif á eflingu mannréttinda í heiminum.
Í pallborðinu verða:
-Ali Samadi, leikstjóri Lost Children;
-Birna Þórarinsdóttir, framkvæmdastýra UNIFEM á Íslandi;
-Elle Flanders, leikstjóri Zero Degrees of Separation;
-Heiða Jóhannsdóttir, frá Kvikmyndafræðideild HÍ;
-dr. Samba Gadjigo, aðstandandi Mooladé;
-Stefán Ingi Stefánsson, framkvæmdastjóri UNICEF á Íslandi.
Umræðustjóri verður Þórunn Sveinbjarnardóttir, þingmaður.
Fundurinn fer fram í Norræna húsinu og hefst kl. 17:00. Umræðurnar fara fram á ensku.
