Fréttir
Norðurlönd - griðland fyrir ofbeldismenn?
Regnhlífarsamtökin “Nordiske kvinner mot vold” voru stofnuð í Noregi árið 1994 fyrir norrænu kvennaathvörfin 225. Stígamót og fjöldi annarra samtaka sem starfa á svipuðum vettvangi slógust svo fljótlega í hópinn. Um er að ræða óformlegt tengslanet um 300 samtaka sem reynst hefur mjög vel. Haldnar hafa verið árlegar ráðstefnur og margir vinnuhópar fræði- og baráttukvenna hafa unnið mikið starf sem tengst hefur samtökunum. Á alþjóðavettvangi höfum við líka margsinnis staðið að sameiginlegri dagskrá.
Yfirskrift ráðstefnunnar er “Norden – amnesti for voldsmenn – om handlinger og handlingslammelse overfor seksualisert vold”. Yfirskriftin er ekki gripin úr lausu lofti. Ef aðeins er horft til starfsemi Stígamóta er það umhugsunarefni að aðeins 6-10% af þeim málum sem okkur berast eru kærð. Við það má svo bæta öllum þeim málum sem eru felld niður vegna skorts á sönnunum. Reynsla kvennaathvarfanna á Norðurlöndunum er ekki ólík.
Að hluta til munum við brjóta upp hefðbundið ráðstefnuform. Fagleg umræða verður opnuð af dr. Mariu Eriksson sem hélt utan um stóra norræna rannsóknarverkefnið “Kyn og ofbeldi” sem varði í fimm ár og lauk nú í sumar.
Síðan kynnir Tove Smaadahl framkvæmdastýra norsku kvennaathvarfahreyfingarinnar raddir fjögurra norrænna kvenna sem nýtt hafa sér þjónustu athvarfanna. Kynnt verða dæmi um naugðun, sifjaspell, vændi og ofbeldi í parsambandi.
Að lokum bjóðum við til panelumræðu sem leidd verður af Brynhildi Flóvenz lektor við lagadeild HÍ. í henni munu taka þátt þau Dorit Otzen framkvæmdastýra Hreiðursins og Stop kvindehandel sem er ríkisverkefni í Danmörku, Rachel Paul frá Jafnréttisstofu í Noregi, Sjak Haaheim saksóknari í Noregi og Maria Eriksson fræðikona frá Svíþjóð. Opnað verður fyrir stuttar fyrirspurnir og athugasemdir úr salnum.
Leitast verður við að fá fram uppbyggilega umræðu um það hvernig norrænu velferðarsamfélögin geti á sem ábyrgastan hátt tekist á við kynbundið ofbeldi. Hvernig er hægt að gera ofbeldismenn ábyrga fyrir gerðum sínum og styðja þau sem verða fyrir ofbeldinu? Hvernig getur fagfólk orðið eins fært og verða má? Hvaða aðgerðir á að setja í gang og hvaðan eiga fjármunirnir að koma?
Að auki verður boðið upp á 12 vandaða vinnuhópa um ólík efni sem tengjast yfirskriftinni og ráðstefnunni lýkur með móttöku hjá forseta Íslands.
