Samtök um kvennaathvarf

Samtök um kvennaathvarf hvetur Alþingi til að tryggja rekstrargrundvöll Mannréttindaskrifstofu Íslands til frambúðar. Það er nauðsynlegt fyrir lýðræði og mannréttindi að hér á landi starfi óháður greiningar- og eftirlitsaðili á sviði mann-réttindamála. Því hlutverki hefur Mannréttindaskrifstofa Íslands gegnt frá stofnun, 1994.

Til að tryggja trúverðugleika og sjálfstæði Mannréttindaskrifstofu Íslands þarf skrifstofan að fá fast fjármagn af fjárlögum til rekstrar í stað þess, eins og nú er, að þurfa að leita eftir því hjá einstaka ráðuneytum á hverju ári.

Stjórn Samtaka um kvennaathvarf

Í hádeginu næstkomandi föstudag ( 2. des. kl. 12.00 ? 12. 45) verður þáttur Barnaheilla ? Save the Children á Íslandi í 16 daga átakinu í húsakynnum samtakanna við Suðurlandsbraut 24. (Ath. breytingu frá áður auglýstum tíma!)Þátttakan felst í að kynna ábendingalínu Barnaheilla og verkefnið ,,Stöðvum barnaklám á Netinu!?. Sagt verður meðal annars frá tölulegum upplýsingum, alþjóðasamstarfi okkar og samstarfi við lögreglu og netþjónustuaðila og tekin verða saman helstu lagaákvæði sem í gildi eru um barnaklám í íslenskri löggjöf. Vonast er eftir góðum og skynsamlegum umræðum um þetta viðkvæma málefni í lokin. Með von um að sem flestir sjái sér fært að mæta.

Hér á landi er blásið til 16 daga átaks gegn kynbundnu ofbeldi í annað sinn þann 25. nóvember, en það er alþjóðlegur baráttudagur gegn kynbundnu ofbeldi. Átakið stendur til 10. desember, alþjóðlega mannréttindadagsins, og er átakinu ætlað að tengja saman, með táknrænum hætti, kynbundið ofbeldi og mannréttindi. Upplýsingar um viðburði átaksins má nálgast hér. Að átakinu hér landi standa 25 félagasamtök og stofnanir: Alnæmisbörn, Alnæmissamtökin á Íslandi, Amnesty International á Íslandi, Blátt áfram, Bríet ? félag ungra femínista, Femínistafélag Íslands, Konur gegn limlestingu, Kvenfélagasamband Íslands, Kvennahreyfing Öryrkjabandalags Íslands, Kvennaráðgjöfin, Kvenréttindafélag Íslands, Mannréttindaskrifstofa Íslands, Neyðarmóttaka vegna nauðgunar, Rannsóknastofa í kvenna- og kynjafræðum, Rauði Kross Íslands, Samtök kvenna af erlendum uppruna á Íslandi, Samtök um kvennaathvarf, Soroptimistasamband Íslands, Stígamót, Styrkur ? úr hlekkjum til frelsis, UNIFEM á Íslandi, V-dagssamtökin, Zonta á Íslandi, Þjóðkirkjan.

Nánari upplýsingar um átakið má finna á heimasíðu UNIFEM.

Föstudaginn 25. nóvember heldur UNIFEM á Íslandi árlegan morgunverðarfund félagsins á Hótel Loftleiðum kl. 8:30-10:00.

Fundurinn er haldinn á alþjóðlegum baráttudegi gegn ofbeldi gegn konum og markar upphafið að 16 daga átaki gegn kynbundnu ofbeldi sem nú er haldið hér á landi í annað sinn. Á þriðja tug samtaka og stofnana standa sameiginlega að átakinu dagana 25. nóvember til 10. desember og eru þar með þátttakendur í átaki 1700 samtaka í 130 löndum. UNIFEM á Íslandi og Samtök um kvennaathvarf hafa forgöngu um verkefnið í ár. Upplýsingar um dagskrá og aðstandendur átaksins er að finna á vef UNIFEM á Íslandi.

Yfirskrift átaksins árið 2005 er Heilsa kvenna, heilsa mannkyns: Stöðvum ofbeldið.

Fréttatilkynning frá Blátt áfram:

Angela Shelton verður viðstödd sýningu á mynd sinni Searching for Angela Shelton sem sýnd verður á kvikmyndahátíðinni í kvöld sem nú stendur yfir. Sjá www.icelandfilmfestival.is Myndin verður sýnd í Regnboganum dagana 8 nóv ? 14 nóv.

Við hjá Blátt áfram erum mjög ánægðar með að hafa staðið að komu Angelu Shelton til Íslands nú í annað sinn. Angela kom til Íslands á vegum V-dagssamtakanna fyrir nokkrum árum síðan. Angela er í raun hetjan mín þar sem ég man enn þegar ég sá viðtal við hana hjá Oprah Winfrey fyrir rúmlega tveimur árum þegar ég var búsett í bandaríkjunum.  Hún hafði mikil áhrif á mig og ýtti undir það að ég fluttist til íslands til að miðla af minni reynslu. Angela mun einnig heimsækja Háskóla Íslands og Stígamót á meðan á heimsókn hennar stendur.  Við hvetjum sem flesta til að koma og sjá þessa merkilegu mynd og fræðast um málaflokkinn á www.blattafram.is

Aðgerðahópur gegn kynbundnu ofbeldi fagnar ákvörðun ríkisstjórnarinnar um að hafin verði skoðun á því með hvaða hætti megi standa að gerð og framkvæmd heildstæðrar aðgerðaáætlunar gegn heimilisofbeldi og kynferðislegu ofbeldi hér á landi.  

Við fögnum því að aðgerðaáætlunin verði unnin í samvinnu við hagsmunaaðila og frjáls félagasamtök og lýsum jafnframt áframhaldandi vilja til samstarfs.  Einnig treystum við því að drög þau sem við unnum og kynntum stjórnvöldum í vor verði höfð til hliðsjónar við gerð aðgerðaáætlunar.  

Við lýsum ánægju okkar vegna ráðningar starfsmanns til að vinna að aðgerðaáætluninni og að búast megi við niðurstöðum til umfjöllunar strax á vormánuðum 2006. 

Þá fögnum við því að barátta frjálsra félagasamtaka, kvennahreyfingarinnar og einstaklinga beri nú ávöxt og vonumst til að í mars 2006 verði kynnt heildstæð aðgerðaáætlun sem miðar að því að útrýma þeim smánarbletti sem kynbundið ofbeldi er á íslensku samfélagi. nánar

Vegna þess að:

...atvinnutekjur kvenna eru aðeins 64,15% af atvinnutekjum karla

...konur eru með 72% af launum karla fyrir jafnlangan vinnutíma
...barneignir hafa neikvæð áhrif á laun kvenna en jákvæð áhrif á laun karla
...margar konur búa við öryggisleysi og ógn á heimilum sínum
...ein af hverjum þremur konum verður fyrir kynbundnu ofbeldi á lífsleiðinni
...konur uppskera ekki í samræmi við menntun sína
...konur í fyrirtækjarekstri hafa verri aðgang að fjármagni
...ábyrgð á umönnun barna og heimilisstörfum er enn að mestu á höndum kvenna
...umönnunarstörf eru með lægst launuðu störfum á vinnumarkaði
...rödd kvenna er veik í fjölmiðlum
...litið er á líkama kvenna sem söluvöru
...kona hefur aldrei verið forsætisráðherra, bankastjóri eða biskup
...konur hafa aldrei verið helmingur þingmanna
...konur njóta ekki jafnréttis á við karla
...þessu þarf að breyta. Ég þori, get og vil!

KONUR SÝNUM SAMSTÖÐU

Leggjum niður störf á Kvennafrídaginn 24. október kl. 14.08 og fyllum miðborgina svo eftir verði tekið ? eins og fyrir 30 árum.
Hittumst á Skólavörðuholti kl. 15 og förum í kröfugöngu. Baráttufundur á Ingólfstorgi kl. 16.

UNIFEM á Íslandi og Rannsóknastofa í kvenna- og kynjafræðum við Háskóla Íslands boða til ráðstefnu föstudaginn 21. október kl. 9.15-16.15 í hátíðarsal Háskóla Íslands, aðalbyggingu.

Á ráðstefnunni flytja þekktar erlendar fræðikonur og baráttukonur erindi. Þar er fyrst að nefna prófessor Anne Phillips frá London School of Economics, sem hefur einkum rannsakað og skrifað um lýðræðishallann. Osnat Lubrani er svæðisstjóri UNIFEM í Austur-Evrópu, með aðsetur í Bratislava, Rosa Logar er frá samtökunum Women Against Violence Europe (WAVE) and Domestic Abuse Intervention Centre í Austurríki, Flora Macula kemur frá UNIFEM í Kosovo og Mieke Verloo, er prófessor við Háskólann í Nijmegen í Hollandi og ráðgjafi framkvæmdarstjórnar ESB og Evrópuráðsins um stefnumótun jafnréttismála. Meðal fyrirlesara frá Íslandi eru Rachel Lorna Johnstone lektor við Háskólann á Akureyri, Lilja Mósesdótti prófessor við Viðskiptaháskólann á Bifröst, Guðrún Jónsdóttir hjá Stígamótum og Jónína Einarsdóttir lektor við Háskóla Íslands

Í dag, miðvikudaginn 5. október, efnir UNIFEM á Íslandi í samvinnu við Alþjóðlega kvikmyndahátíð í Reykjavík til pallborðsumræðna um mikilvægi kvikmynda til eflingar mannréttindum.

Kvikmyndir eru einstakur miðill sem ná á undraverðan hátt að tjá sammannlega reynslu. Í mannréttindaflokki hátíðarinnar eru verðlaunamyndir sem sýna sjónarhorn fólks sem á að öllu jöfnu ekki opinbera rödd. Markmið pallborðsumræðanna er að ræða hvort og þá hvernig kvikmyndir og kvikmyndagerð geta haft áhrif á eflingu mannréttinda í heiminum.

Á ýmsum tímum og jafnvel enn þann dag í dag hefur sumum, þó einkum konum, þótt það undarleg ósköp að vera kona. Þann 24. október 2005 eru liðin 30 ár frá því að konur á Íslandi létu til sín taka með eftirminnilegum hætti og héldu frídag kvenna hátíðlegan með pompi og prakt.

Útvarpsleikhúsið á Rás 1 hefur af þessu tilefni undirbúið spennandi syrpu útvarpsleikrita um hina kvenlegu sýn og afstöðu til kvenna. Á fimmtudagskvöldum kl. 22.15 í október og nóvember eru flutt leikrit um konur og eftir konur. Sífellt hafa einhverjir spekingar, oftast karlkyns, verið að segja konum til, segja þeim hvernig þær eru, hvernig þær eigi að vera, hvað þær geti og geti ekki og hverjar skyldur þeirra eru. Í sumum leikritanna koma karlar við sögu en sýnin er kvenleg. Flutt eru verk eftir fimm íslenska höfunda og tvo erlenda.

Hádegisverðarfundur Kvenréttindafélags Íslands, haldinn á Grand hótel, fundarsal Háteigi (4. hæð), fimmtudaginn 29. september n.k. kl. 12:00 ? 13:00. Margrét Sverrisdóttir varaformaður KRFÍ setur fundinn.

Viðfangsefni fundarins er misjöfn staða kynjanna í atvinnulífinu og í fyrsta sinn í sögu Kvenréttindafélags Íslands þá eru það eingöngu karlar sem verða með framsögu um jafnréttismál. Fjallað verður um kynjahluföll í stjórnum fyrirtækja, í stjórnunarstöðum banka og sparisjóða og atvinnurekendur í landbúnaði, þar sem konur eru ávallt miklu færri en karlar. Spurningin er hverjar ástæðurnar séu og þá hvernig breyta megi þessari stöðu.  Er það verkefni atvinnurekenda, ríkisins eða bara einstaklinganna sjálfra að fjölga konum í þessum stöðum?

Nú gefst kjörið tækifæri til að taka þátt í að skapa kvennasögu Íslands og láta til sín taka í baráttunni fyrir jafnrétti því hinn 24. október næstkomandi verður kvennafrídagurinn endurvakinn en þá eru liðin 30 ár frá kvennafríinu 1975. Konur eru hvattar til að leggja niður störf klukkan 14:08 en þá hafa þær unnið fyrir launum sínum, ef litið er til munar á atvinnutekjum karla og kvenna sem eru 64,15% af launum karla. Samkvæmt þessu eru konur búnar að vinna fyrir sínum launum, eftir fimm tíma og átta mínútur (miðað er við vinnudag kl. 9-17).

Stígamót standa fyrir opnum fræðslu- og umræðufundum annan hvern fimmtudag í vetur. Lykilfólk úr fræðunum og þeim starfsstéttum sem koma að málaflokknum munu kynna áhugaverð efni. Haldnar verða stuttar kynningar á viðfangsefnunum með umræðum á eftir. Boðið verður upp á léttan hádegisverð á lágu verði.

Markmið þessara fræðslu- og umræðufunda eru:

• Fræðsla og vitundarvakning
• Aukinn og auðveldari aðgangur að Stígamótum fyrir alla

Umræðufundirnir verða haldnir annan hvern fimmtudag frá kl.12:00 ? 13:00 í húsi Stígamóta að Hverfisgötu 115.

Starfskona óskast í Kvennaathvarfið. Starfið er krefjandi vaktavinna sem felst í að aðstoða konur og börn sem til Kvennaathvarfsins leita. Ekki er krafist sérstakrar menntunar, en starfskonur skulu vera orðnar 25 ára og búa yfir nærgætni, hæfileikum til að vinna sjálfstætt og skipulega, og getu til að ráða við krefjandi aðstæður í mannlegum samskiptum. Áætluð er tveggja vikna þjálfun í upphafi starfs.

Í kvennaathvarfinu er lögð áhersla á heimilislegt og notarlegt andrúmsloft þar sem ríkir góður starfsandi. Nánari upplýsingar veitir Drífa Snædal, fræðslu- og framkvæmdastýra Samtaka um kvennaathvarf í síma 561 3740 eða netfangi: drifa@kvennaathvarf.is. Upplýsingar um starfsemina er að finna á heimasíðunni: www.kvennaathvarf.is.

Eftirfarandi mótmæli frá kvennasamtökum hafa verið send alþingisfulltrúum, fjölmiðlum og forsvarsmönnum Símans, Skjás 1 og 365 Ljósvakamiðla:

Ríkisfyrirtækið Síminn hefur um nokkurt skeið dreift og selt aðgang að stöðinni Adult Channel í gegnum breiðbandið. Nýverið fjölluðu fjölmiðlar um að Skjár 1, sem er að hluta til í eigu sama ríkisfyrirtækis, hafi gert samning við sjónvarpsstöðina Playboy TV um dreifingu á klámefni.

Baráttufundur kvenna á Þingvöllum 19.júní 2005 samþykkti eftirfarandi kröfugerð sem gerð er á grundvelli Pekingáætlunar Sameinuðu þjóðanna.

Þann 19. júní eru liðin 90 ár frá því að íslenskar konur fengu kosningarétt.
Að því tilefni hafa kvennasamtök landsins sameinast um hátíðar- og
baráttudagskrá helgina 18.-19. júní. Laugardaginn 18. júní verður athöfn í
Hólavallakirkjugarði í Reykjavík. Athöfnin hefst kl. 11 með
tónlistarflutningi Mörtu Guðrúnar Halldórsdóttur, sópran og Hallfríðar
Ólafsdóttur, flautuleikara. Borgarstjóri Reykjavíkur, Steinunn Valdís
Óskarsdóttir, flytur ávarp í minningu forystukvenna
kvenréttindahreyfingarinnar og blóm verða sett á legstaði forystukvenna í
kvenréttindamálum.

Athöfninni stýrir Auður Styrkársdóttir, forstöðumaður Kvennasögusafns
Íslands.

Að þessari athöfn standa Feministafélag Íslands, Kvenréttindafélag Íslands,
Kvenfélagasamband Íslands, Kvennasögusafn Íslands, Kvennakirkjan,
Rannsóknastofa í kvenna- og kynjafræðum, Samtök um kvennaathvarf, Stígamót og UNIFEM á Íslandi í samvinnu við Reykjavíkurborg og Kirkjugarða
Reykjavíkur.

Boðað er til kvennaþings 4. júní að Hallveigarstöðum kl 11:00-14:00 í tilefni af fyrirhuguðum breytingum á stjórnarskrá Íslands.

Með núverandi endurskoðun stjórnarskrárinnar gefst íslenskum konum í fyrsta sinn tækifæri til að hafa bein áhrif á stjórnarskrá landsins. Það er vel við hæfi að konur hefji upp raust sína nú þegar minnst er 90 ára afmælis kosningaréttar kvenna á Íslandi. Að mörgu er að huga við endurskoðun stjórnarskrár ef tekið er mið af jafnréttissjónarmiðum. Málefnum kynjanna er ekki hægt að skipa á þröngan bás, þau snerta samfélagið allt og nú er tími til kominn að stjórnarskráin endurspegli það.

Eftirfarandi er fréttatilkynning frá aðgerðahópi gegn kynbudnu ofbeldi:

Aðgerðahópur gegn kynbundnu ofbeldi fagnar yfirlýsingum dómsmálaráðherra, Björns Bjarnasonar um aðgerðir sem hafnar eru gegn kynbundnu ofbeldi. Á morgunverðafundi með fulltrúum félagasamtaka og stjórnvalda tjáði ráðherra fundargestum að hafin væri vinna við endurskoðun kynferðisbrotakafla almennra hegningarlaga. Í máli hans kom einnig fram að refsiréttanefnd hefur fengið til umfjöllunar fyrirspurn ráðherra um sérstakt refsiákvæði er lýtur að heimilisofbeldi. Þá kom fram að bættar verklagsreglur lögreglu um heimilisofbeldi eru í vinnslu hjá ríkislögreglustjóra.

Í fyrramálið klukkan 8:30 gefst tækifæri til að eiga orðastað við stjórnvöld um til hvaða aðgerða skuli gripið gegn kynbundnu ofbeldi. Fundurinn er hugsaður sem samræðuvettvangur til að koma að hugmyndum og athugasemdum en byggt er á drögum að aðgerðaáætlun sem unnin voru í kjölfar 16 daga átaks gegn kynbundnu ofbeldi.

Fundurinn er haldinn á Grand hótel, efstu hæð, þann 27. maí milli klukkan 8.30 og 10.00. Aðgangseyrir er 1.300 krónur með morgunverði. Brynhildur Flóvenz, lögfræðingur stýrir fundi og Drífa Snædal, framkvæmdastýra Kvennaathvarfsins, kynnir drög að aðgerðaáætlun. Fulltrúar ráðuneyta skýra frá þeirri vinnu og stefnumótun sem fer fram í ráðuneytunum. Staðfest er að Björn Bjarnason dómsmálaráðherra sitji fundinn og Ragnhildur Arnljótsdóttir, ráðuneytisstjóri félagsmálaráðuneytisins.

Mikilvægt er að sem flest mæti til að taka þátt í samræðum.

F.h. aðgerðahóps gegn kynbundnu ofbeldi: Jóhanna K. Eyjólfsdóttir, framkvæmdastjóri Íslandsdeildar Amnesty International, Guðrún D. Guðmundsdóttir, framkvæmdastjóri Mannréttindaskrifstofu Íslands, Drífa Snædal, fræðslu-og framkvæmdastýra Samtaka um kvennaathvarf, Birna Þórarinsdóttir, framkvæmdastýra UNIFEM á Íslandi, Guðrún Jónsdóttir, talskona Stígamóta

Í fréttum Ríkissjónvarpsins í gærkveldi var sagt frá deilum sem spunnist hafa í Svíþjóð eftir að haft var eftir formanni ROKS, regnhlífasamtaka kvennaathvarfa í Svíþjóð, að menn væru skepnur. Af þessu tilefni vill stjórn Samtaka um kvennaathvarf koma á framfæri yfirlýsingu ROKS sem ber heitið ?Menn eru ekki skepnur?. Þar kemur fram að ummælin voru slitin úr samhengi, verið var að vitna í bók eftir bandaríska konu, Valerie Solanas, sem upplifað hefur grófustu hliðar kynferðisofbeldis, nauðganir og vændi. Í skrifum sínum segir Valerie að það að kalla karlmann skepnu sé vægt til orða tekið. Formaður ROKS segist skilja þessa afstöðu konu sem hafi upplifað verstu birtingamyndir kynjamisréttis en þetta sé ekki afstaða ROKS. Ummælin voru hins vegar klippt til í sjónvarpsþætti í Svíþjóð og hvetur stjórn ROKS til þess að viðtalið við formanninn verði birt í heild sinni. Nánar má sjá yfirlýsingu stjórnar og formanns ROKS á www.roks.se.

Samtök um kvennaathvarf óska eftir því að fjölmiðlar birti allar hliðar málsins enda geti einhliða skýringar haft alvarleg áhrif á starfsemi kvennaathvarfa hérlendis sem erlendis. Starfsemi kvennaathvarfa er gríðarlega nauðsynleg fyrir þær fjölmörgu konur sem beittar eru ofbeldi og það er ábyrgðahlutur að kasta rýrð á þá starfsemi.

Stjórn Samtaka um kvennaathvarf

Boðað er til samræðna á milli stjórnvalda og félagasamtaka um aðgerðaáætlun gegn kynbundnu ofbeldi, til hvaða aðgerða þurfi að grípa og hvernig skuli staðið að þeim. Fundurinn er haldinn á Grand hótel, efstu hæð, þann 27. maí milli klukkan 8.30 og 10.00. Aðgangseyrir er 1.300 krónur með morgunverði. Þær tillögur sem Samtök um kvennaathvarf í félagi við fleiri samtök hafa lagt fram um aðgerðaáætlun má nálgast hér.

Eftirfarandi fréttatilkynning barst frá Íslandsdeild Amnesty International:

?Á nýafstöðnum leiðtogafundi Evrópuráðsins í Varsjá skrifaði Davíð Oddsson utanríkisráðherra fyrir hönd Íslands undir samning Evrópuráðsins gegn mansali. Íslandsdeild Amnesty International fagnar undirskrift Íslands og hvetur Alþingi til að staðfesta samninginn strax á haustþingi.

Málþing um kosningarétt kvenna og áhrif hans í 90 ár verður haldið í hátíðasal Háskóla Íslands, 20. maí 2005 kl. 13.00 - 17.00. Málstofustjóri Erla Hulda Halldórsdóttir sagnfræðingur.

Þann 19. júní næstkomandi verða 90 ár liðin frá því að Danakonungur undirritaði lögin sem veittu konum sem orðnar voru 40 ára og eldri rétt til að kjósa og bjóða sig fram til Alþingis. Hver var aðdragandi þess að konur hlutu kosningarétt og hvernig var umræðan í kringum kosningaréttinn? Hvernig þróaðist kosningaþátttaka kvenna og lögðu konur áherslu á önnur mál en karlar? Hvers vegna var boðinn fram kvennalisti árið 1922 og hvaða erindi töldu kvenréttindakonur sig eiga inn á svið stjórnmálanna. Þessum spurningum munu fræðimenn leitast við að svara í þeim erindum sem flutt verða á málþinginu.

Samtök um kvennaathvarf vilja koma á framfæri eftirfarandi fréttatilkynningu frá BIRTINGU - ungu fólki gegn ofbeldi:

Undanfarin misseri hefur aukið ofbeldi í samfélaginu verið mikið í umræðunni. Nú teljum við að komið sé nóg. Við getum ekki setið aðgerðalaus lengur. Við viljum senda skýr skilaboð bæði til stjórnvalda og almennings og vekja landann til umhugsunar um hve stórt vandamálið er. Saklaust fólk hefur ítrekað orðið fyrir barðinu á ofbeldismönnum sem virðast geta vaðið uppi í samfélaginu án þess að gripið sé til nokkurra aðgerða. Þetta viljum við stöðva!

Í nóvember á síðasta ári stóðu 16 félagasamtök og stofnanir fyrir 16 daga átaki gegn kynbundnu ofbeldi. Átakinu lauk með afhendingu áskorunar til yfirvalda um að setja fram heildstæða aðgerðaáætlun gegn kynbundnu ofbeldi á Íslandi er hefði réttlæti, forvarnir, stuðning og vernd til handa fórnarlömbum að leiðarljósi.

Í kjölfar átaksins var settur á fót aðgerðahópur gegn kynbundnu ofbeldi á Íslandi með það að markmiði að stuðla að upplýstri umræðu um málefnið og vera stjórnvöldum til stuðnings og leiðbeiningar við gerð aðgerðaáætlunar er tæki til löggjafar, dómstóla, saksóknara og löggæslu, félagslegra úrræða, fræðslu til almennings og fagaðila; ásamt sértækum aðgerðum innan mennta-, heilbrigðis- og félagslega kerfisins. Tillögur að aðgerðaáætluninni eru að finna hér.

Eftirfarandi pistil flutti Drífa Snædal, framkvæmdastýra Samtaka um kvennaathvarf á Útvarpi Sögu miðvikudaginn 13. apríl:

Í vikunni sat ég afar merkilega ráðstefnu sem bar heitið Úr hlekkjum til frelsis og fjallaði um kynbundið ofbeldi, aðallega gegn börnum. Ég held að það hafi ekki látið neinn ósnortinn sem í salnum sat þegar Svava Björnsdóttir miðlaði af reynslu sinni af kynferðislegu ofbeldi í æsku. Ég persónulega hef aldrei orðið vitni að slíku hugrekki, að lýsa því sem óbærilegt hlýtur að vera fyrir framan hundrað manns í ráðstefnusal. Draga fram myrkustu leyndarmál heimilisins og matreiða fyrir ráðstefnugesti og síðar um kvöldið að endurtaka leikinn í Kastljósinu. Slíkt hugrekki er nánast einsdæmi og ýtir undir þá skynjun að ofbeldi gegn börnum sé afar fátítt.

Við þekkjum of mörg einhvern sem hefur lifað af ofbeldi. Sum okkar betur en önnur. Við bjóðum þér að sýna samstöðu, sýna í verki að við tökum ekki lengur þátt í samsæri þagnarinnar. Ofbeldi þrífst í þögninni! Komdu á Arnarhól, þann 9. apríl milli tvö og fimm með þinn stuttermabol, með eða án texta - við sköffum snúru og klemmur.

Við hengjum upp bol fyrir okkur sjálf sem höfum lifað af ofbeldi og ef þú þekkir einhvern sem hefur lifað af ofbeldi getur þú hengt upp boli fyrir hann/hana. Ef þú vilt segja frá einhverju sem varðar ofbeldi, lesa ljóð eða stutta sögu, eða bara nafnið þitt til þess að rjúfa þögnina þá verður það í boði. Við styðjum þig í að gera það sem þú þarft til þess að rjúfa þögnina þína.

Fjölskyldan hefur verið mikið í umræðunni undanfarið og virðast ráðamenn þjóðarinnar sem og almenningur hafa áhyggjur af afdrifum hennar. Sýningin leitast við að skyggnast inn í þann raunveruleika sem margir eiga við að glíma. nánar

Á fyrsta fundi nýrrar stjórnar Samtaka um kvennaathvarf skipti stjórnin með sér verkum með þessum hætti: Guðrún Elín Jónsdóttir, formaður, Elísabet Hjaltadóttir, varaformaður, Elín Sigurðardóttir, ritari, Edda Linn Rise, gjaldkeri og Tatjana Latinovic, meðstjórnandi.

Í varastjórn sitja Þórdís Guðmundsdóttir og Sonja B. Jónsdóttir. Hægt er að senda tölvupóst beint á stjórnina: stjorn@kvennaathvarf.is

Ársskýrsla Samtaka um kvennaathvarf fyrir árið 2004 er nú aðgengileg á netinu í pdf-formi. Hægt er að nálgast prentað eintak af skýrslunni með því að panta hana í síma 561 3720 eða á netfanginu thorlaug@kvennaathvarf.is

Aldrei hafa fleiri komur verið skráðar í Kvennaathvarfið en árið 2004 ef tekið er mið af bæði stuðningsviðtölum og þeim sem komu í dvöl, eða alls 531 koma. Á bak við þennan fjölda eru 254 konur. Alls komu 88 konur komu til dvalar á árinu og 55 börn en dvalardagarnir voru 1568.

Í dag hefst þemavika Hjálparsíma Rauða krossins: 1717 sem ber yfirskriftina ?Heimilisofbeldi: í víðasta skilningi þess orðs?.

Áhersla verður lögð á að fá þá sem búa við heimilisofbeldi og ekki síst þá sem beita því til að hringja í 1717 og fá ráðleggingar og stuðning við að rjúfa þögnina og reyna að stíga skref til að komast út úr vítahringnum.