Kvennaathvarfið verður opið yfir hátíðirnar eins og aðra daga og veitir skjól konum og börnum þeirra sem ekki geta dvalið heima hjá sér vegna ofbeldis. Einnig er svarað er í neyðarsímann í síma 5611205 allan sólarhringinn.

Aðventan hefur verið ánægjuleg og viðburðarrík í Kvennaathvarfinu og hefur hlýhugur í garð athvarfsins og íbúa þess verið áberandi sem aldrei fyrr. Góðvinir athvarfsins hafa bankað upp á með ýmsar gjafir og sjálfboðna þjónustu og góðar gjafir hafa borist frá einstaklingum, fyrirtækjum og stofnunum.

Mánudaginn 19. desember fengum við heimsókn frá Fulltrúaráði verkalýðsfélaganna í Reykjavík sem veitti Samtökum um kvennaathvarf styrk að upphæð kr. 500.000.  Rekstrarstýra Kvennaathvarfsins veitti styrknum viðtöku og mun hann nýtast vel til frekari uppbyggingar barnastarfs í athvarfinu.

Stjórn og starfskonur Kvennaathvarfsins eru þakklátar fyrir hlýhug og stuðning og senda út bestu óskir um gleðileg og friðsöm jól.